Hopi interes pa Proyekto “Tuma Bo Pèrmit”

Hopi interes pa Proyekto “Tuma Bo Pèrmit”

Willemstad – Durante di e promé siman di e proyekto “Tuma Bo Pèrmit”, Servisio di Atmishon a yuda un total di 772 persona. Esaki tabata di promé di desèmber pa 5 di desèmber 2025. E kantidat aki ta mustra ku tin hopi persona ku tabata warda e oportunidat pa por pasa tuma nan título di residensia.

Durante e proyekto “Tuma Bo Pèrmit”, ta duna mas tantu persona posibel e oportunidat pa tuma nan título di residensia den forma di un stèmpel, sin tin ku traha sita. Esaki ta nifiká ku personanan ku a risibí un desishon positivo i ku tin tur e dokumentunan nesesario original pa tuma nan pèrmit, no mester traha un sita. E personanan aki por pasa di djaluna pa djaweps di 8:00 am pa 3:00 pm i riba djabièrnè di 8:00 pa 12:00 pm.

Durante e proyekto ta parti un kantidat máksimo di number pa dia, konforme e kapasidat di persona ku Servisio di Atmishon por akapará. E último orario ku por tuma number di djaluna pa djaweps ta 2:30 pm i riba djabièrnè 11:30 pm. Mirando ku tin sitanan traha kaba te ku fin di desèmber 2025, ta keda na e persona si e ke akudí konforme su sita òf si e ta pasa durante e proyekto sin sita.

Servisio di Atmishon ta kontentu ku hopi persona ya a hasi uzo di e oportudidat ku e proyekto aki ta brinda. Alabes, ta enkurashá tur persona ku ainda no a tuma nan título di residensia (stèmpel) pa probecha di e oportunidat aki ku ta finalisá djamars 30 di desèmber 2025.

Pa mas informashon tokante Servisio di Atmishon por subi website www.immigrationcur.org òf página di facebook i instagram Admission Office Curaçao.