Dokumento pa personanan residente³

E siguiente dokumentonan ta esnan rekerí den kasonan regular, ora un menor di edat ta biaha òf ora ta biaha ku un menor di edat. Den kasonan eksepshonal e outoridatnan di frontera por rekerí e dokumentonan ku ta apliká den kaso di e eksepshon spesífiko ei. Si no por presentá e dokumentonan rekerí i pa protekshon di e menor di edat, lo no permití su entrada òf salida.

Pa por logra un manera uniformá pa laga mayor(nan) outorisá òf tutor(nan) duna pèrmit, a diseñá un formulario di outorisashon⁴. Mester yena i firma e formulario e representante legal ku ta duna pèrmit na e menor di edat i asigná e persona mayor di edat (un persona natural òf representante di un instituto) ku ta kompañ’é i kende ta keda enkargá ku su kuido durante henter e biahe i/òf durante e periodo menshoná riba e formulario.

Mester presentá e siguiente dokumentonan na e ámtenar di frontera na warda ora un menor di edat ta biaha òf ora ta biaha ku un menor di edat. Ta spesifiká e dokumentonan segun e kaso ku ta apliká pa e menor di edat.

Urgensia i kasonan spesial
Den kaso di urgesia òf kasonan spesial, por ehèmpel ora ta trata di kasonan médiko, por aserká e “Teamleider” di departamentu di Kòntròl di Frontera di e Unidat pa Supervishon di Estranhero i Kòntròl di Frontera na +5999 674 0143.

KUMINSÁ KU PREPARASHONNAN TREMPAN
Konsiderando e diferente dokumentonan ku mester presentá, e diferente sitanan ku mester traha na e respektivo instansianan i e tempu di espera pa risibí e dokumentonan, ta konsehá pa kuminsá ku preparashonnan pa biaha ku un mucha menor di edat na tempu.

VIGENSIA i PERIODO DI TRANSISHON
E sirkular aki ta drenta na vigor dia 1 di yüli 2023.
Lo tene kuenta ku un periodo di transishon di 1 luna pa por presentá e dokumentonan. Den e periodo transitorio aki un buki di famia tambe por remplasá e akta di nasementu i e ekstrakto largu (“lange uittreksel”). 

Entrante 1 di ougùstùs 2023 públiko mester tene su mes di forma kompletu na e sirkular aki.

³ Sea ta Ulandes òf estranhero; Un estranhero menor di edat ku ta residente di Kòrsou mester tene su mes mas tantu posibel na e regulashonnan aki.

⁴ Anekso.